Shavkat Mirziyoyev — Oʻzbekiston Respublikasi Prezidenti “Yangi Hayot” texnoparkiga tashrif buyurdi.

Prezident tashrifi “Yangihayot” texnoparkining O‘zbekiston sanoat siyosatidagi muhim strategik o‘rnini yaqqol namoyon etadi. Texnopark yangi ish o‘rinlarini yaratish, investitsiyalarni jalb etish va zamonaviy ishlab chiqarish infratuzilmasini rivojlantirishga xizmat qiluvchi samarali platforma hisoblanadi.

Uchrashuv chog‘ida kompaniya rahbariyati bilan ishlab chiqarishni modernizatsiya qilish yo‘nalishlari, innovatsion texnologiyalarni joriy etish hamda eksport salohiyatini kengaytirish masalalari muhokama qilindi. Muhandislik plastiklari ishlab chiqarishini mahalliylashtirish, shuningdek, kompaudlash sohasida ilmiy-texnik ishlanmalarni rag‘batlantirish uchun zarur shart-sharoitlar yaratishga alohida e’tibor qaratildi.

Prezident bunday tashabbuslarning mamlakat sanoati uchun muhimligini qayd etdi va innovatsion polimer yechimlar barqaror rivojlanish, import o‘rnini bosish hamda yangi ish o‘rinlari yaratishga xizmat qilishini ta’kidladi.